Peşəkar Futbol Liqasının təşkilatçılığı ilə idman jurnalistləri arasında 22 iyul – Milli Mətbuat Gününə həsr olunmuş intellektual yarış keçirilib. 

Prosport.Az xəbər verir ki, PFL tərəfindən ənənə halını almış turnir 5-ci dəfə baş tutub.

Budəfəki yarışda komanda seçimi mərhələsi əvvəlki turnirlərdən fərqlənib. Belə ki, digər turnirlərdə ən çox mükafatçılar sırasına düşmüş, çempion olmuş media nümayəndələri “səpələnmişlər” səbətinə salınıb və bu cür iştirakçıların 2 nəfərdən çoxu eyni komandada yer almayıb.  
80-ə yaxın media nümayəndəsinin iştirak etdiyi turnir maraqlı və yaddaqalan alınıb. Təsadüfi deyil ki, çempion son turda müəyyənləşib.

Yarışda komandalara Azərbaycan Premyer Liqasının 2026/27 mövsümündə iştirak edəcək 12 klubun adları verilib. Yekunda "Şamaxı" komandası qalib, "Sabah" 2-ci, "Kəpəz" 3-cü olub.

Tədbirin sonunda "Şamaxı" komandasına medallar və kubok təqdim edilib. Həm qaliblər (1200 AZN), həm də 2-ci (700 AZN) və 3-cü yerlərin (300 AZN) sahibləri pul mükafatına layiq görülüb. Yarışın xanım iştirakçılarına xüsusi hədiyyələr, eyni zamanda Azərbaycan Kuboku mövzusunda suallara ən yaxşı cavab verən 4 komandanın üzvlərinə xatirə mükafatları verilib.

Qeyd edək ki, bu yarışda Prosport.Az İdman Agentliyinin rəhbəri Səbuhi Musa Ceyhun Əliyev (sport24.az), Elmir Əliyev (haqqin.az), İsmayıl Xeyrullayev (apasport.az), Əli Cəfərov ("Xəzər TV"), Orxan Əliyev (İTV) və Həşim Məmmədovla (sportnet.az) birgə "Sabah" komandasını təmsil edib. "Sabah" son 2 turadək öncədən lider olsa da, sonradan 2-ci yerlə kifayətlənib.