"Sabah" UEFA Çempionlar Liqasının I təsnifat mərhələsində iyulun 14-də Uels təmsilçisi TNS ilə cavab oyununa çıxacaq.

Prosport.Az xəbər verir ki, "Sabah"ın baş məşqçisi Valdas Dambrauskas matçdan əvvəl keçirilən mətbuat konfransında komandasının oyuna tam ciddi yanaşmalı olduğunu bildirib.

“İlk növbədə qeyd etmək istəyirəm ki, burada olduğumuz üçün çox xoşbəxtik. Həm futbolçular, həm də məşqçilər heyəti sabahkı oyunu böyük həyəcanla gözləyir.

Düzdür, cavab qarşılaşmasını səfərdə, İngiltərədə keçirəcəyik. İlk oyundan fərqli olaraq sabah daha yüksək konsentrasiya ilə çıxış etməliyik. Bilirik ki, rəqib doğma meydanda oynayacaq və burada yaradılacaq atmosferin fərqindəyik. Hamıya məlumdur ki, ev sahibi komandalar öz meydanında adətən 20-25 faiz daha yaxşı çıxış edirlər.

Buna görə də arxayınlaşa bilmərik. İlk oyunda üstünlük qazanmağımıza baxmayaraq düşünməməliyik ki, artıq hər şey həll olunub. Əksinə, sabah da əlimizdən gələni etməli, meydandan qələbə ilə ayrılmağa çalışmalı və daha güclü komanda olduğumuzu bir daha sübut etməliyik.”

Litvalı mütəxəssis komandanın heyətində ciddi problemin olmadığını da vurğulayıb.

“Sevindirici haldır ki, komandamız səfərə heç bir zədə problemi olmadan gəlib. Çox rahat və uğurlu səfər etdik, hətta uyğunlaşmaq üçün adət etdiyimizdən bir gün əvvəl bura gəldik. Komandada əhval-ruhiyyə yüksəkdir, hər kəs özünü yaxşı hiss edir. Yeganə çatışmazlıq tam heyətlə məşq etmək imkanımızın olmamasıdır. Sabah meydanda ən yaxşı oyunumuzu göstərməli və keyfiyyətimizi bir daha nümayiş etdirməliyik.”