İsveçrə millisinin baş məşqçisi Murat Yakın DÇ-2026-nın 1/4 finalında Argentinaya 1:3 hesabı ilə uduzduqları oyundan sonra hakim idarəçiliyini sərt tənqid edib.

Prosport.Az xəbər verir ki, "Blick" nəşrinə danışan mütəxəssis matçın dönüş nöqtəsinin Bril Embolonun qırmızı vərəqə alması olduğunu bildirib.

“Futbolçularımla fəxr edirəm. Onlar əla mübarizə apardılar. Amma hakimin bir qərarı bizi zəiflətdi və bütün planlarımızı pozdu. Həmin qərarla qətiyyən razı deyiləm. Bu, bizim üçün çox ağrılı məğlubiyyətdir.

Qırmızı vərəqədən az əvvəl oyunda təşəbbüsü ələ keçirmişdik və hücumumuzu gücləndirmək üçün əvəzetmə etməyə hazırlaşırdıq. Bu qaydanı kimin düşündüyünü bilmirəm, amma onunla hesablaşmaq məcburiyyətindəyik. Lakin hakimin qərarını heç cür başa düşə bilmirəm.

Əgər Embolo həmin epizoda görə sarı vərəqə aldısa, deməli, bundan əvvəl Brilə qarşı edilən analoji qayda pozuntularına görə də rəqib futbolçular xəbərdarlıq almalı idilər. Nəticədə cəzalanan biz olduq. Mənim üçün hələ də anlaşılmazdır ki, hakimin bir qərarı komandanı bu qədər zəiflədə bildi”, – deyə Yakın bildirib.

Qeyd edək ki, İsveçrə hesabı bərabərləşdirdikdən qısa müddət sonra Bril Embolo VAR müdaxiləsindən sonra simulyasiyaya görə ikinci sarı vərəqə alaraq meydandan qovulub. Say üstünlüyündən istifadə edən Argentina əlavə vaxtda daha iki qol vuraraq 3:1 hesablı qələbə qazanıb və DÇ-2026-nın yarımfinalına yüksəlib.