Cənubi Afrika millisinin və "Mamelodi Sandaunz" klubunun yarımmüdafiəçisi Ceyden Adams 25 yaşında vəfat edib.

Prosport.Az xəbər verir ki, bu barədə Soccer Laduma portalı futbolçunun mentoruna istinadən məlumat yayıb.

Adamsın ölüm səbəbi hələlik açıqlanmayıb. Bəzi KİV-lərdə onun depressiyada olduğu və intihar etdiyi iddia edilsə də, futbolçunun mentoru bu məlumatı təkzib edib.

"Bu itki hamını sarsıtdı. Dünya çempionatından yenicə qayıtmışdıq və belə bir xəbər aldıq. Cümə axşamı onunla danışmışdıq. O, dünya çempionatından sonra meydana qayıtmağa və yenidən oynamağa köklənmişdi. Hazırda söz tapmaq çətindir. Ailənin şəxsi həyatına hörmətlə yanaşılmasını xahiş edirik. Bəli, onun vəfat etdiyini təsdiqləyə bilərəm. Heç kim bunu gözləmirdi", – deyə mentor bildirib.

Qeyd edək ki, Ceyden Adams DÇ-2026-da Cənubi Afrika millisinin heyətində qrup mərhələsinin hər üç oyununda meydana çıxıb. O, milli komandada keçirdiyi 9 matçda 1 qol vurub. Klub karyerası ərzində isə "Mamelodi Sandaunz" və "Stellenboş"un formasını geyinib.