DÇ-2026-nın təqvimi İspaniya La Liqasının 2026/2027 mövsümünün ilk turunda bir sıra oyunların təxirə salınmasına səbəb ola bilər.

Prosport.Az xəbər verir ki, bu barədə "Marca" nəşri məlumat yayıb.

Bildirilib ki, La Liqa prezidenti Xavyer Tebas daha əvvəl dünya çempionatında iştirak edən futbolçuların istirahət və yeni mövsümə hazırlıq üçün kifayət qədər vaxt əldə etməsi məqsədilə bəzi qarşılaşmaların tarixinin dəyişdirilə biləcəyini açıqlamışdı.

İspaniya və Fransa yığmalarının DÇ-2026-nın yarımfinalına yüksəlməsi ilk turun dörd oyununun təxirə salınmasını qaçılmaz edib. Söhbət aşağıdakı qarşılaşmalardan gedir:

"Barselona" – "Atletik"

"Real Madrid" – "Real Sosyedad"

"Atletiko" – "Malaqa"

"Selta" – "Osasuna"

Bundan başqa, daha bir oyunun taleyi Argentina – İsveçrə arasında keçiriləcək 1/4 final matçının nəticəsindən asılı olacaq.

İsveçrə yarımfinala yüksələrsə, "Sevilya"nın futbolçuları Cibril Sou və Ruben Varqasın milli komandada olması səbəbindən "Sevilya" – "Rayo Valyekano" görüşünün ertələnməsi gözlənilir.

Argentina yarımfinala adlayacağı təqdirdə isə "Real Betis"in argentinalı yarımmüdafiəçisi Covanni Lo Çelsonun mundialda iştirakını nəzərə alaraq "Valensiya" – "Real Betis" matçının təxirə salınması gündəmə gələ bilər.

Qeyd edək ki, Xavyer Tebas dünya çempionatında iştirak edən bütün futbolçulara son oyunlarından sonra üç həftə istirahət və yeni mövsümə hazırlıq üçün əlavə üç həftə vaxt veriləcəyini bildirib.