“Qarabağ” heyətini Bosniya və Herseqovina millisinin müdafiəçisi Nihad Muyakiçlə gücləndirməyə hazırlaşır.

Prosport.Az Serbiya mətbuatına istinadən xəbər verir ki, Ağdam təmsilçisi 27 yaşlı futbolçunun transferi ilə bağlı “Partizan”la razılığa gəlib.

Muyakiç son mövsümü icarə əsasında Türkiyədə keçirib. O, əvvəlcə “Eyüpspor”, daha sonra isə “Qaziantep”in formasını geyinsə də, hər iki klub müdafiəçinin transfer hüquqlarını almaqdan imtina edib. Bunun ardından futbolçu yenidən “Partizan”a qayıdıb.

Mərkəz müdafiəçisi 2024-cü ildə Türkiyənin “Ankaragücü” klubundan “Partizan”a transfer olunmuşdu. O, Belqrad təmsilçisinin heyətində ümumilikdə 34 rəsmi oyuna çıxıb və 1 məhsuldar ötürmə ilə yadda qalıb.

Muyakiç karyerası ərzində Bosniya və Herseqovinanın “Sarayevo”, Belçikanın “Kortriyk” və “Beveren”, Xorvatiyanın “Hayduk” (Split), Türkiyənin “Ankaragücü”, “Eyüpspor” və “Qaziantep” klublarında da çıxış edib. O, Bosniya və Herseqovina millisinin də formasını geyinir.