"Doğma "Mingəçevir"dən ayrılmaq mənim üçün çox çətin olsa da, geridə qalan 1 il ərzində xoş izlər qaldı. Bu müddət ərzində bizdən dəstəyini əsirgəməyən hər bir kəsə — başda klub rəhbərliyinə, çiyin-çiyinə çalışdığım məşqçilər heyətinə, meydanda hər matçda can qoyan futbolçularımıza və klubun görünməz qəhrəmanları olan inzibati heyətə sonsuz minnətdarlığımı bildirirəm".

Prosport.Az xəbər verir ki, bu sözləri "Mingəçevir"in baş məşqçisi vəzifəsindən ayrılan Ramiz Məmmədov klubun rəsmi saytına açıqlamasında deyib.

Mütəxəssis sabiq komandası ilə vidalaşıb: "​Xüsusi təşəkkürüm isə bizi heç bir oyunda tək qoymayan, həm ev, həm də səfər matçlarında komandanın yanında olan fan-klubumuza və bütün Mingəçevir azarkeşlərinədir. Sizin tribunadakı dəstəyiniz və sonsuz sevginiz hər zaman bizə güc verdi.

​"Mingəçevir"in bir hissəsi olmaq mənim üçün böyük bir şərəf idi və burada keçirdiyim hər bir anı həmişə minnətdarlıqla xatırlayacağam. Mingəçevirə böyük futbolun gec-tez gələcəyinə inamım tamdır və mənim üçün bu şəhərin, bu klubun yeri hər zaman xüsusi olaraq qalacaq.

​Doğma komandama gələcək yolda uğurlar arzulayıram.

Hər şey üçün təşəkkürlər"!

Qeyd edək ki, Ramiz Məmmədov "Karvan-Yevlax"ın baş məşqçisi təyin olunub.