Avropa Liqasının I təsnifat mərhələsinin “Qarabağ” – “Vestri” (İslandiya) oyunundan (3:0) sonra qonaq komandanın baş məşqçisi Daniel-Osafo Badu jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bölüşüb.

– Çox çətin oyun oldu. “Qarabağ” keyfiyyətini göstərdi. Futbolçularımın performansından məmnunam. Yaxşı müdafiə olunurduq, ancaq səhvlərimizdən qollar buraxdıq.

– Daha böyükhesablı məğlubiyyət təhlükəsini hiss edirdiniz?
– Nəticədən məmnun qalmamışam. Sadəcə qazandığımız təcrübədən və oyunçuların yanaşmasından razıyam.

– Cavab oyununda komandanızda nələri dəyişməyi düşünürsünüz?
– Vaxtımız var, daha çox keyfiyyəti artırmalı, topla oyunumuzu yaxşılaşdırmalıyıq.

– Çempionatda son matçlarınızda qələbə qazana bilmirsiniz. Demək olar ki, bütün diqqətiniz “Qarabağ”da olduğu üçün belə xal itkiləriniz oldu?
– Xeyr. “Qarabağ”la oyun bizim üçün əlavə motivasiyadır. Bizim prioritetimiz daxili çempionatdır.

– Komandanızda razı qaldığınız məqamlar hansılardır?
– “Qarabağ” fantastik oynadı. Onlara qarşı mübarizə aparmaq çətin idi. Oyundan əvvəl deyirdilər ki, “Qarabağ” bizə 10 qol vuracaq. Amma yekun 0:3 oldu. Bəlkə də, ilk hissə 0:1-lə başa çatsaydı, yekun fərqli alınardı.