UEFA Çempionlar Liqasının 1-ci təsnifat mərhələsində "Sabah"ın rəqibi olacaq Uelsin TNS klubunun baş məşqçisi Kreyq Harrison oyunöncəsi fikirlərini bölüşüb.

Prosport.Az xəbər verir ki, mütəxəssis "Sabah"ın güclü komanda olduğunu vurğulayıb:

"Bilirik ki, bizi çətin oyun gözləyir. "Sabah"ın daxili çempionatda "Qarabağ"ı üstələyərək çempion olması çox şey deyir. Tarixən "Qarabağ" Avropada həm Avropa Liqasında, həm də Çempionlar Liqasında həmişə çox yaxşı çıxış edən komanda olub. Onlar bu il də Çempionlar Liqasında "Benfika", "Nyukasl" kimi böyük klublara qarşı yaxşı oyun sərgilədilər. Buna görə də "Qarabağ"dan üstün olaraq çempion olan "Sabah"ın nə qədər güclü komanda olduğunu çox yaxşı dərk edirik".

Harrison heyətdə yeni zədəli futbolçunun olmadığını bildirib:

"Bəli, bir neçə zədəli futbolçumuz var, lakin son vaxtlar yeni zədələnən kimsə yoxdur. Bunlar son altı həftədə və ya ötən mövsümün sonunda zədələnən oyunçularımızdır. Hazırkı vəziyyətdə heyətimizdə yeni itki yoxdur".

O, rəqibi ətraflı təhlil etdiklərini də qeyd edib:

"Rəqibin ötən mövsümdəki 6-7 oyununu izləmişik. Yeni transferləri də təhlil etmək imkanı tapdıq. "Sabah"ın heyətində beynəlxalq səviyyədə çıxış etmiş, böyük təcrübəyə malik top futbolçular var. Bizi matç günü çox çətin sınaq gözləyir".

TNS-in baş məşqçisi Bakı barədə də xoş fikirlər səsləndirib:

> "Bakı heyrətamizdir. Komandamızın əksər üzvləri ilk dəfədir buraya gəlir. Şəhər həqiqətən də çox gözəldir".