DÇ-2026-nın 1/8 finalında Meksika ilə qarşılaşacaq İngiltərə millisinin təhlükəsizlik tədbirləri gücləndirilib.

Prosport.Az BBC-yə istinadən xəbər verir ki, iyulun 6-da Mexikodakı “Asteka” stadionunda keçiriləcək görüş öncəsi İngiltərə yığmasının məskunlaşdığı otelin mühafizəsinə 100-dən çox zirehli polis əməkdaşı cəlb olunub.

Buna səbəb komandanın Meksika azarkeşləri tərəfindən aqressiv qarşılanması olub. İngiltərə millisinin avtobusu otelə çatarkən yüzlərlə azarkeş futbolçuları fitə basıb, eyni zamanda Meksika millisinin şüarlarını səsləndirib.

Bundan sonra otelin ətrafı polis tərəfindən nəzarətə götürülüb, əraziyə xüsusi maneələr quraşdırılıb. Təhlükəsizlik tədbirlərinə milli qvardiya əməkdaşları, xidməti itlər və pilotsuz uçuş aparatları da cəlb edilib.

Qeyd edək ki, Meksika millisi “Asteka” stadionunda uğurlu statistikaya malikdir. Komanda bu arenada keçirdiyi 89 oyunun cəmi ikisində məğlub olub və dünya çempionatlarında burada son 10 matçda uduzmayıb.

Meksika – İngiltərə görüşü iyulun 6-da Bakı vaxtı ilə saat 04:00-da başlayacaq.