Azərbaycanın vitse-çempionu “Qarabağ”ın Avropa Liqasının Liqa mərhələsinə gedən yolu gözlənildiyindən bir qədər asan olacaq.

Prosport.Az haqqın.az-a istinadən xəbər verir ki, buna səbəb UEFA-nın Çexiyanın “Karvina” klubunu avrokuboklardan kənarlaşdırmasıdır. Çexiya Kubokunun sahibi bizim “Turan Tovuz” kimi danışılmış oyunlara görə cəzalandırılıb.

Beləliklə, “Karvina” Avropa Liqasında çıxış etmək hüququndan məhrum edilib. Bu klub Çexiyanın yüksək reytinqi sayəsində Avropa Liqasının pley-off mərhələsindən yarışa başlamalı idi. İndi isə “Karvina”nın yerini həmin mərhələdə Plzen “Viktoriya”sı tutacaq. Halbuki bu komanda yarışa Avropa Liqasının 2-ci təsnifat mərhələsindən başlamalı idi. “Viktoriya”nın əvəzinə isə 2-ci təsnifat mərhələsində “Hradets Kralove” çıxış edəcək.

UEFA reytinqi 42,750 xal olan “Qarabağ “1-ci təsnifat mərhələsinin püşkatmasında səpələnmişlər sırasında idi və rəqib qismində İslandiya təmsilçisi “Vestri” ilə qarşılaşacaq. Komandalar arasında ilk oyun iyulun 9-da Bakıda, cavab görüşü isə iyulun 16-da Reykyavikdə keçiriləcək. Artıq 2-ci təsnifat mərhələsinin də püşkü atılıb. Burada da “Qarabağ” səpələnmişlər sırasında olub və ona Bolqarıstanın SSKA (Sofiya) – İrlandiyanın “Derri Siti” cütünün qalibi rəqib olub.

3-cü təsnifat mərhələsinin püşkü 20 iyulda, 2-ci mərhələnin startından əvvəl keçiriləcək. Əvvəlcədən planlaşdırılırdı ki, “Qarabağ” bu mərhələdə səpələnməmiş komandalar sırasında olacaq. Bu halda onun rəqibləri Portuqaliyanın “Benfika”, Şotlandiyanın “Reyncers”, Macarıstanın “Ferensvaroş”, Danimarkanın “Midtyulland”, Yunanıstanın PAOK, Avstriyanın “Zaltsburq” və yenə də Çexiyanın “Viktoriya” klublarından biri ola bilərdi. Lakin Plzen təmsilçisi 50,500 xallıq reytinqi ilə artıq pley-off mərhələsindən yarışa başlayacağı üçün səpələnmişlər sırasındakı yerini məhz “Qarabağ”a verəcək. Ağdam klubu səpələnməmişlər arasında ən yüksək reytinqə malik komanda olacaq.

Beləliklə, “Qarabağ”ın 3-cü təsnifat mərhələsində potensial rəqiblərinin siyahısı xeyli asanlaşıb. Hazırda bunlar aşağıda adları qeyd edilənlərdir:

“Yagelloniya” (Polşa);

“Hammarbü” (İsveç) – “Anderlext” (Belçika) cütünün qalibi;

“Tromse” (Norveç) – “Hradets Kralove” (Çexiya) cütünün qalibi;

“Makkabi” (Təl-Əviv, İsrail), “Şerif” (Moldova) və “Alüminiy” (Sloveniya) üçlüyündən bir komanda;

“Pafos” (Kipr), “Hayduk” (Xorvatiya) və “Jilina” (Slovakiya) üçlüyündən bir komanda;

Çempionlar Liqasında “Şturm” (Avstriya) – “Harts” (Şotlandiya) cütünün məğlubu;

Çempionlar Liqasında “Fənərbaxça” (Türkiyə) – “Qurnik” (Polşa) cütünün məğlubu.

Pley-off mərhələsinə vəsiqə qazanacağı halda isə “Qarabağ” əvvəlcədən nəzərdə tutulduğu kimi yenə də səpələnmişlər sırasında olacaq. Bu mərhələdə potensial rəqiblər barədə danışmaq hələ tezdir. Mənzərə 2-ci təsnifat mərhələsindən sonra daha da aydınlaşacaq.