II Liqada çıxış edən "Şirvan" FK və AFFA Region Liqasının iştirakçısı "Şirvan" OİK klubları birləşib.

Prosport.Az xəbər verir ki, bu barədə klubların ortaq bəyanatında məlumat verilib.

Bildirilib ki, bu mühüm addım Şirvan futbolunun inkişafı naminə atılıb.

"İctimaiyyətin və hər iki klubun azarkeşlərinin diqqətinə çatdırırıq ki, "Şirvan" FK və "Şirvan" OİK rəhbərliklərinin qarşılıqlı razılığı əsasında bu gündən etibarən vahid klub şəklində fəaliyyətlərini davam etdirmək qərarı qəbul edilib.

Bu qərar hər iki klubun tarixini, ənənələrini və qazandığı dəyərləri qorumaqla yanaşı, Şirvan şəhərində futbolun daha güclü təmsil olunması, mövcud potensialın bir mərkəzdə birləşdirilməsi, infrastrukturun inkişafı, gənc futbolçuların yetişdirilməsi və qarşıya qoyulan idman hədəflərinə daha effektiv şəkildə çatmaq məqsədi daşıyır.

Yeni mərhələdə fəaliyyət göstərəcək vahid klub hər iki kollektivin zəngin irsini özündə birləşdirəcək, şəhərimizi ölkə futbolunda daha layiqli şəkildə təmsil etmək üçün bütün imkanlarını səfərbər edəcək.

Bu birləşmə heç bir klubun tarixinin sona çatması deyil. Əksinə, bu, 2 dəyərli yolun ortaq məqsəd naminə birləşərək daha güclü gələcək qurması deməkdir. İnanırıq ki, bu addım Şirvan futbolunun inkişafında yeni bir dövrün başlanğıcı olacaq.

Bu günə qədər hər iki kluba dəstək göstərən azarkeşlərimizə, veteran futbolçularımıza, məşqçilərimizə, tərəfdaşlarımıza və şəhər ictimaiyyətinə təşəkkürümüzü bildiririk. İnanırıq ki, bundan sonra da eyni birlik və inamla vahid klubumuzun yanında olacaq, uğurlarımızı birlikdə qeyd edəcəyik.

Yeni hədəflər, yeni uğurlar və daha güclü Şirvan futbolu naminə bu yola birlikdə çıxırıq", – deyə bəyanatda qeyd olunub.

Qeyd edək ki, "Şirvan" FK ötən mövsüm debüt etdiyi II Liqada 4-cü yeri tutub.