"Qəbələ" tezliklə Bakıya köçə bilər. Bu, klub rəhbərliyinin niyyətidir.

Prosport.Az sportinfo.az-a istinadən xəbər verir ki, bölgə təmsilçisinin rəhbərliyi baş məşqçi Kaxaber Sxadadzeni seçim qarşısında qoyub.

2024-cü ilin martiından bəri burada çalışan gürcüstanlı mütəxəssisdən komandanın paytaxta köçürülməsinə razılıq verməsi istənilib.

Plana əsasən, kollektiv gündəlik məşqlərini Bakıda keçməli, yalnız ev oyunlarından 1 gün qabaq Qəbələyə qayıtmalıdır. Baş məşqçinin diqqətinə çatdırılıb ki, əyalətdə məskunlaşmaq həm xərc, həm də seleksiya baxımından onlara qətiyyən sərf eləmir.

Belə ki, danışıqlar aparılan legionerlərin bir çoxu Bakıdan kənarda yaşamaq istəmədiyini deyərək, «Qəbələ»nin dəvətini geri çevirib. Artıq 10-dan artıq əcnəbi "qırmızı-qaralar"ın təklifinə analoji cavab verib. Rəsmilər narahatdır ki, bu gedişlə heyəti gücləndirə bilməyəcəklər.

"Qəbələ" rəsmiləri "İmişli", "Turan Tovuz" və "Araz-Naxçıvan"ı Sxadadzeyə nümunə çəkib. Bildiriblər ki, adıçəkilən region təmsilçiləri Bakıda məskunlaşmaqla bir çox problemlərdən qurtulub.

Qeyd edək ki, "Qəbələ" Premyer Liqada qalmaq tapşırığının öhdəsindən son anda gəlib. Sumqayıtda keçirilən pley-off görüşündə "Mingəçevir"i 2:0 hesabıyla məğlub ediblər.