Yeni avrokubok mövsümünün startına artıq sayılı günlər qalıb. Azərbaycanı Avropada təmsil edəcək klublar hazırlıqlarını davam etdirirlər. Onlardan biri də "Qarabağ"dır. Lakin Ağdam təmsilçisi bu dəfə öyrəşdiyi kimi UEFA Çempionlar Liqasında deyil, UEFA Avropa Liqasında mübarizəyə başlayacaq. Qurban Qurbanovun komandası turnirə I təsnifat mərhələsindən qoşulacaq.
Ötən mövsüm ölkə çempionluğunu əldən verən "Qarabağ" yeni mövsümə ciddi heyət dəyişiklikləri ilə hazırlaşır. Klub indiyədək 5 transfer reallaşdırıb, 8 futbolçu ilə isə yollarını ayırıb. Məqsəd təkcə heyəti yeniləmək deyil, həm də ötən mövsümün uğursuzluğunu Avropa Liqasında uğurlu çıxışla unutdurmaqdır.
"Qarabağ"ın ilk rəqibi İslandiyanın "Vestri" klubudur. Kağız üzərində bu rəqib Ağdam təmsilçisi üçün keçilməsi mümkün olan komanda təsiri bağışlayır. Transfermarkt məlumatına görə, "Vestri"nin ümumi bazar dəyəri cəmi 1,39 milyon avrodur. Üstəlik, klub tarixində ilk dəfə ölkə kubokunu qazanaraq avrokuboklara vəsiqə əldə edib. Bu səbəbdən "Qarabağ" cütün aşkar favoriti hesab olunur.
Ağdam klubu bu mərhələni adlayacağı təqdirdə, növbəti raundda MOİK (Sofiya) – "Derri Siti" (İrlandiya) cütünün qalibi ilə qarşılaşacaq. "Qarabağ"ın son illərdə Avropada qazandığı təcrübə və göstərdiyi nəticələr fonunda bu rəqiblər də keçilməz görünmür.
Son illər Azərbaycan futbolunun Avropadakı əsas təmsilçisinə çevrilən "Qarabağ" hər mövsüm azarkeşlərdə böyük gözləntilər yaradır. Xüsusilə də komandanın 2023/24 mövsümündə Avropa Liqasında 1/8 finala qədər irəliləməsi bu dəfə də uğurlu çıxışa inamı artırır.
Yeni mövsüm öncəsi heyətdə ciddi dəyişikliklər edilib. Ayrılan futbolçuların boşluğunu doldurmaq üçün yeni transferlər reallaşdırılıb. Komandadan ayrılması gözlənilən Abdullah Zubirin gedişindən sonra onu Jali Muaddibin əvəz etməsi gözlənilir. Maraqlıdır ki, yeni futbolçu bir neçə gün əvvəl verdiyi müsahibədə Zubirin yerini doldurmaq istədiyini bildirmişdi.
Bundan başqa, qapıçı Fabiyan Buntiçi xorvatiyalı Martin Zlomisliç, müdafiəçi Toral Bayramovu Bruno Lanqa, yarımmüdafiəçi Leandro Andradeni isə Samuel Lobatu əvəz etməyə çalışacaq.
"Qarabağ"ın uzun müddətdir yaşadığı mərkəz hücumçu problemi də, görünür, öz həllini tapıb. Komandanın yeni transferi, Qambiya əsilli isveçli hücumçu Zakaria Savo "Tirol"la keçirilən yoxlama oyununda het-trik edib.Savonun əsas mərkəz hücumçusu kimi çıxış etməsi Kamilo Duranın isə daha çox cinahda oynamaq imkanını artıracaq.
Artıq oyunlara təxminən bir həftə vaxt qalıb. "Qarabağ" hazırlıqlarını son mərhələyə çatdırır və yeni avrokubok mövsümünə iddialı başlamağa hazırlaşır.
Bahar Rüstəm