"Neftçi" hazırda iki legioneri ilə yollarını ayırmaq istəyir.

Prosport.Az sportal.az-a istinadən xəbər verir ki, "ağ-qaralar" Andrey Ştoqrini komandadan göndərmək istəyir.

Hazırda ukraynalı futbolçu ilə danışıq gedir. Yuri Vernidubun planlarına daxil olmayan Ştoqrinin klubla müqavilə müddəti 2027-ci il iyunun 30-a qədərdir.

Ölkəmizi Konfrans Liqasında təmsil edəcək paytaxt klubu Alessio Kurçini isə icarəyə yollamağı planlaşdırır. Hazırda Lüksemburq millisinin üzvü ilə də danışıqlar aparılır. Kurçinin isə müqavilə müddəti 2028-ci il iyunun 30-a kimidir. Onları komandadan göndərdikdən sonra "Neftçi"nin daha 2 legioner transferini reallaşdıracağı ehtimal edilir.

Ən yaxşı halda, "Neftçi" həm Ştoqrin, həm də Kurçini icarəyə göndərməyi nəzərdən keçirir.

Əlavə edək ki, hər iki futbolçu "Neftçi"nin Sloveniya toplanışına cəlb edilib.