İspaniya futbolunda uzun müddətdir davam edən hüquqi mübahisələrdən biri “Real Madrid”in xeyrinə yekunlaşıb.

Prosport.Az klubun mətbuat xidmətinə istinadən xəbər verir ki, İspaniya Ali Məhkəməsi “La Liqa”nın 2015-ci ildə televiziya yayım hüquqlarından əldə olunan gəlirlərin bölüşdürülməsi ilə bağlı nizamnaməyə etdiyi dəyişikliyi qanunsuz hesab edib və həmin müddəanı etibarsız elan edib. Məhkəmə bununla bağlı “La Liqa”nın şikayətini də rədd edib. 

Qərara əsasən, həmin mövsümdə qüvvədə olan əvvəlki bölgü sistemi bərpa olunub. Bu sistemə görə, audiovizual gəlirlərin 60 faizi La Liqada, 40 faizi isə Sequndada çıxış edən klublar arasında bölüşdürülməlidir. Nəticədə “Real Madrid”in təxminən 8,8 milyon avro, həmin dövrdə Sequndada çıxış edən klubların isə ümumilikdə 88 milyon avro əlavə vəsait almaq hüququ yaranıb. 

“Real Madrid” yayımladığı bəyanatda məhkəmə qərarının qanuniliyin bərpası baxımından mühüm əhəmiyyət daşıdığını vurğulayıb. Klub hesab edir ki, bu qərar İspaniya peşəkar futboluna təsir edən qərarların qanuna və şəffaflıq prinsiplərinə uyğun qəbul edilməsini təmin edəcək. 

Qeyd edək ki, Ali Məhkəmə daha əvvəl də “Real Madrid” və “Barselona”nın 2022-ci ildə audiovizual hüquqların idarə olunması ilə bağlı bəzi iclaslardan kənarlaşdırılması məsələsində “La Liqa”nın apellyasiya şikayətini rədd etmişdi.