İngiltərə futbolunun əfsanəsi Alan Şirer Kriştiano Ronaldonun Portuqaliya millisindəki rolu ilə bağlı diqqətçəkən açıqlama verib.

Prosport.Az “Goal” nəşrinə istinadən xəbər verir ki, sabiq hücumçu Portuqaliya millisinin baş məşqçisi Roberto Martinesin Ronaldonu idarə etməkdə çətinlik çəkə biləcəyini bildirib.

Şirer hesab edir ki, Ronaldunun futbol dünyasındakı böyük nüfuzu onun əvəzlənməsi kimi qərarları mürəkkəbləşdirir və bu, komandanın taktiki planlarına təsir göstərə bilər.

İngiltərəli keçmiş futbolçu qeyd edib ki, Ronaldu bütün oyunlarda tam çıxış edə bilməyəcəyini qəbul etməlidir. Əks halda, bu vəziyyət Portuqaliya millisi üçün problem yarada bilər.

Alan Şirer həmçinin Ronaldunun son dövrlərdəki formasının əvvəlki səviyyədə olmadığını vurğulayıb. Onun fikrincə, Lionel Messinin uğurlu çıxışları fonunda portuqaliyalı ulduz müəyyən psixoloji təzyiq hiss edir.

Şirer dünyanın ən yaxşı futbolçusu ilə bağlı müqayisədə üstünlüyü Lionel Messiyə verdiyini də gizlətməyib.