Səudiyyə Ərəbistanının “Əl-Xulud” klubunun sahibi Ben Harborqun “Əl-Nəsr” azarkeşləri ilə bağlı səsləndirdiyi fikirlər narazılığa səbəb olub.

Prosport.Az xəbər verir ki, amerikalı funksioner müsahibəsində bəzi azarkeş qruplarının klublar tərəfindən maliyyələşdirildiyini iddia edib və “Əl-Nəsr” azarkeşlərini də bu qəbildən olan qruplar sırasında göstərib.

Bu açıqlama Kriştiano Ronaldunun çıxış etdiyi klubun azarkeşlərinin sərt reaksiyasına səbəb olub. Sosial şəbəkələrdə geniş etiraz dalğası yarandıqdan sonra Ben Harborq geri addım ataraq üzrxahlıq edib.

O bildirib ki, sözügedən müsahibə 8 ay əvvəl lentə alınıb və həmin dövrdə Səudiyyə Ərəbistanı çempionatı barədə kifayət qədər məlumatlı olmayıb.

Harborq həmçinin vurğulayıb ki, “Əl-Nəsr” kimi böyük azarkeş kütləsinə malik klubun bu cür üsullara ehtiyacı yoxdur və söylədiyi fikirlərə görə klubdan və azarkeşlərdən üzr istəyir.