UEFA 2026/2027 mövsümü üçün avrokubok iştirakçılarının siyahısını açıqlayıb.

Prosport.Az qurumun rəsmi saytına istinadən xəbər verir ki, Rusiya milli komandaları və klublarının UEFA turnirlərindən kənarlaşdırılması qüvvədə qaldığı üçün iştirakçı siyahısında müvafiq dəyişikliklər edilib. Siyahı həmçinin yarışların nəticələrinə və vəsiqələrin yenidən bölüşdürülməsinə uyğun olaraq yenilənib.

Beləliklə, Rusiya təmsilçiləri 2026/2027 mövsümündə də UEFA Çempionlar Liqası, UEFA Avropa Liqası və UEFA Konfrans Liqasında iştirak etməyəcəklər.

Xatırladaq ki, Ukraynaya qarşı genişmiqyaslı hərbi müdaxilədən sonra Rusiya klubları və milli komandaları 2022-ci ilin fevralından etibarən UEFA və FIFA turnirlərindən qeyri-müəyyən müddətə kənarlaşdırılıb.

Qeyd edək ki, son mövsümün yekunlarına əsasən Rusiya UEFA reytinqində 28-ci pillədə qərarlaşıb və nəzəri olaraq avrokuboklarda dörd klubla təmsil olunmaq hüququ qazanıb. Lakin qüvvədə olan sanksiyalar səbəbindən bu hüquqdan istifadə edə bilməyəcək.