Fransa millisinin düşərgəsində futbolçular arasında yaşanan kapitanlıq mübahisəsi yenidən diqqət mərkəzinə düşüb.

Prosport.Az "Tribuna" nəşrinə istinadən xəbər verir ki, Fil Dişi Sahili ilə keçirilən yoldaşlıq oyunundan (1:2) əvvəl EnQolo Kante komandanın kapitanı Kilian Embappeyə qarşı soyuq münasibət nümayiş etdirib. Bildirilir ki, təcrübəli yarımmüdafiəçi matçdan öncə Embappenin yanından keçsə də, onun əlini sıxmayıb.

Xatırladaq ki, tərəflər arasındakı gərginliyin əsası bu ilin mart ayında Kolumbiya ilə keçirilən yoldaşlıq görüşündə qoyulub. Həmin qarşılaşmada sonradan meydana daxil olan Kilian Embappenin komanda yoldaşı Rayan Şerkidən kapitanlıq sarğısını Kantedən almasını tələb etdiyi iddia olunur.

Narazılığa səbəb olan əsas məqam isə EnQolo Kantenin həmin anda əvəzlənməməsi və oyunu davam etdirməsi ilə bağlı olub. Bu hadisədən sonra Fransa millisində kapitanlıq məsələsi ətrafında müzakirələr səngiməyib.

Qeyd edək ki, iyunun 11-də başlayacaq dünya çempionatında Fransa millisi qrup mərhələsində Norveç, Seneqal və İraq yığması ilə qarşılaşacaq.