"Qarabağ”ın İdarə Heyətinin üzvü, Avropa Klublar Assosiasiyasının İcraiyyə Komitəsinin üzvü Asif Əsgərov sosial şəbəkə hesabında FIFA və UEFA rəsmiləri ilə görüşündən fotolar paylaşıb.

Prosport.Az xəbər verir ki, o, dünən UEFA Çempionlar Liqasının Macarıstanın paytaxtı Budapeştdə keçirilən PSJ – "Arsenal" oyununu izləyib.

Əsgərov klubun prezidenti Tahir Gözəlin adından UEFA baş katibinin müavini Corco Markettiyə “Qarabağ” forması hədiyyə edib.

A.Əsgərov paylaşımında 2015-ci ildə UEFA Avropa Liqasında “İnter”ə qarşı keçirilən və klubun Avropa tarixində xüsusi yer tutan oyunu da xatırladığını qeyd edib. O, həmçinin FIFA-da işləyən, AFFA-nın sabiq baş katibi və icraçı vitse-prezidenti Elxan Məmmədovun vasitəçiliyi ilə FIFA prezidenti Canni İnfantino ilə görüşmək imkanı qazandığını vurğulayıb.

Qeyd edək ki, Asif Əsgərovun Budapeştə səfərinin əsas məqsədi UEFA Klub Yarışları Komitəsinin iclasında iştirak olub.