"Neftçi" bosniyalı qapıçısı Kenan Piriçlə də yolları ayıra bilər.

Prosport.Az sportinfo.az-a istinadən xəbər verir ki, Vensan Abubakar, Edvin Kuç və Kristian Kostin karyerasını başqa klubda davam etdirəcəksə, Murad Məmmədov “Pafos”un uğurları üçün tər tökəcək.

Təbii ki, ayrılıqların olacağı dəqiqdir. Başa çatan mövsümdə heyətdə yer alan bir neçə futbolçu, xüsusən də legioner baş məşqçi Yuri Vernidubun gələcək planlarına daxil deyil.

Onlardan biri də Kenan Piriçdir. Ötən yay min bir əziyyət bahasına “Neftçi”yə cəlb olunan bosniyalı qapıçının bacarığı ukraynalı çalışdırıcını qane etmir. Başqa cür desək, Piriçi Emil Balayevlə Rza Cəfərovdan bir baş üstün görmür.

Məhz bu səbəbdən Vernidub 31 yaşlı əcnəbi qolkiperdənsə, yerli oyunçulara şans verib onları milli komandaya qazandırmaq istəyir.

Piriç özü məsələdən halidir. Premyer Liqanın son turlarında Balayevin şans qazanması və özünü kifayət qədər yaxşı tərəfdən göstərməsi qapıçını vəziyyətdən duyuq salıb. Üstəlik, Rzanın “Qəbələ” ilə icarə müqaviləsi başa çatıb.

Hansısa formada Kenan Piriçə çatdırılıb ki, növbəti mövsümdə şans qazanması çətin olacaq. Oynamaq istəyirsə, özünə başqa klub tapsın. Sözsüz, ayrılığa razılıq verəcəyi halda, klubla futbolçu müqavilə şərtlərində hansısa formada razılığa gələcəklər.

Yox, sərfəli maliyyə şərtləri ilə klub tapa bilməsə, “Neftçi”də ehtiyatda oturub pulunu qazanmağa davam edəcək. Yəni bu ehtimal da yox deyil.