"Neftçi"dən gedişi dəqiqləşən oyunçuların sayı 4-ə çatıb.

Prosport.Az sportinfo.az-a istinadən xəbər verir ki, Xordan Resabalanın artıq kluba heç bir aidiyyatı qalmayıb.

Paytaxt təmsilçisi ekvadorlu oyunçunu ötən ilin iyulunda sıralarına qatıb. Həmin vaxt “ağ-qaralar“la 1+1 illik müqavilə bağlamış legionerlə yollar ayrılıb.

Samir Abassovun istəyi ilə ağ-qara formanı geyinmiş, baş məşqçi dəyişikliyindən sonra az-az hallarda meydana ayaq basan 25 yaşlı hücumameyilli yarımmüdafiəçiyə müqavilənin növbəti hissəsinin qüvvəyə minməyəcəyi bildirilib.

Əslində, “Neftçi“də olmaq maddi cəhətdən ona çox sərfəliydi. Zarafat deyil, paytaxt təmsilçisində aylıq məvacibi 25 min dollardır. Bu isə “Sumqayıt“la aldığı əməkhaqqı ilə müqayisədə 5 dəfə çoxdur.

O, “İndependyente”nin (Ekvador) yetirməsidir. Meksika liqasında da çıxış edib. 2024-cü ilin fevralından 2025-ci ilin fevralınadək “Sumqayıt”ın formasını geyinmiş Resabala bir müddət baş məşqçi Samir Abasovun rəhbərliyi altında da oynayıb. Yarımmüdafiəçi 17, 20 və 23 yaşadək futbolçulardan ibarət Ekvador millisinin şərəfini qoruyub, 2019-cu ildə U-20-nin heyətində Cənubi Amerika çempionu olub.

Qeyd edək ki, "Neftçi" Xordan Resabaladan öncə rumıniyalı müdafiəçi Kristian Kostin, monteneqrolu yarımmüdafiəçi Edvin Kuç və kamerunlu hücumçu Vensan Abubakarla yolları ayırıb.