Qurban Qurbanov axır vaxtlar barəsində yayılan müxtəlif söz-söhbətlərə son qoyub.

Prosport.Az sportinfo.az-a istinadən xəbər verir ki, adı "Beşiktaş" da daxil olmaqla, Türkiyə, Rusiya və Avropadan bir neçə klubla yanaşı hallanan baş məşqçi karyerası ilə bağlı növbəti mühüm qərarı verib. O, qarşıdakı 3 ili Ağdam klubunda keçirəcək.

2008-ci ildən "köhlən atlar"ı çalışdıran təcrübəli mütəxəssis 2029-cu ilədək qüvvədə olan müqavilə imzalayıb. Yeni kontrakta əsasən, "Qarabağ" Qurbanovun əməkhaqqısını artırıb.

Azərbaycanın ən güclü məşqçisi ötən illər ərzində "Qarabağ"a saysız-hesabsız uğurlar qazandırıb. Komandanı 13 dəfə ölkə çempionu edib, 6 dəfə kuboku başı üzərinə qaldırıb. Həmçinin komandanı dəfələrlə avrokubokların qrup mərhələsinə daşıyıb.

Bu mövsüm 2-ci dəfə Çempionlar Liqasında iştirak hüququ əldə edən kollektiv pley-off mərhəsinə qədər yol qət edib.