Bassala Sambu "Neftçi" rəhbərliyini şoka salıb.

Prosport.Az sportinfo.az-a istinadən xəbər verir ki, ingiltərəli hücumçunu düşərgədə saxlamaqda maraqlı olan klub aldığı cavaba heyrət edib.

Belə ki, "ağ-qaralar" Seneqal əsilli forvarda 2+1 illik yeni müqavilə təklif irəli sürüb. Premyer Liqanın cari mövsümündə 11 qola imza atan forvard isə nə az, nə çox, düz 500 min dollar tələb edib.

Onun istəyi o qədər gözlənilməz olub ki, klubda hər kəs təəccüb və təəssüf içindədir. Çünki Bassalanın ötən müddətdə aldığı aylıq maaş bu rəqəmdən qat-qat aşağıdır. Odur ki, anlaşmanın yenilənmə ehtimalı azdır.

Azərbaycana 2025-ci ilin fevralında gələn Sambunun son klubu Cənubi Kipr təmsilçisi "Enosis" olub. 28 yaşlı forvardla bağlanmış 1,5 illik müqavilə iyunda başa çatacaq.
Karyerasına İngiltərədə başlayan Sambu “Koventri”nin yetirməsidir. O, 2017 və 2019-cu illərdə “Everton”la 23 yaşadək futbolçular arasında keçirilən İngiltərə Premyer Liqasının qalibi olub.

Ölkə xaricində 2021-ci ildə icarə əsasında oynadığı "Randers"lə Danimarka Kubokunu qazanıb.

Sambu başa çatan mövsümün yekunlarına əsasən, "Neftçi"nin ən məhsuldar 2 simasından biridir. Onunla yanaşı, Emin Mahmudov da liqada 11 dəfə fərqlənib.