"1-cisi, Qarabağ 30 il işğal altında qalıb. Bu 30 il ərzində nə qədər şəhid verdiyimizi hamımız bilirik. Mənim atam da onlardan biridir".
Bunu Prosport.Az-a açıqlamasında karate üzrə Avropa çempionu olmaqla tarix yazmış Mədinə Sadıqova deyib.
Almaniyanın Frankfurt şəhərində keçirilmiş karate üzrə Avropa çempionatında həm də fərdi şəkildə (55 kq) qızıl, həm də qadın komandası daxilində bürünc medalla Vətənə qayıdan Sadıqovun atası kapitan Vasif Sadıqovu "şəhid" adlandırması bəzi şəxsləri narahat edib. Sosial şəbəkələrdə onun şəhid olmadığı, qızının bundan istifadə etdiyi kimi sözlər işlədilməyə başlanılıb.
24 yaşlı Mədinə buna aydınlıq gətirməyə çalışıb və sosial şəbəkədə bu cür ifadələr işlədənlərə müraciət edib: "Qanunvericiliyə görə, xidməti vəzifəsini yerinə yetirərkən həlak olan hərbçilər şəhid sayılır. Şəhidlik kimi bir mövzuda kimin “layiq” olub-olmamasına nə mən, nə də siz qərar verə bilərik.
Mən Azərbaycan vətəndaşıyam, azərbaycanlı qızıyam. Atam I Qarabağ müharibəsində iştirak edib, “Daşaltı” əməliyyatında yaralanıb və döyüşlərə görə dövlət tərəfindən medallarla təltif olunub. Mən bu dövlətin bayrağını ucaldan bir ailənin övladıyam.
Ona görə xahiş edirəm ki, bu mövzuda danışanda daha həssas və məsuliyyətli olun. Son olaraq demək istəyirəm ki, başa düşürəm, siz də öz işinizi görürsünüz. Amma haqqımda bilib-bilmədən yazan jurnalistlərə əsaslanıb mənə irad bildirmək düzgün deyil.
Mənim üzərimdən sadəcə təbrik edib keçmək olardı. Şəhid övladı olduğum üçün yox, Azərbaycan qadını olaraq Avropa çempionu olduğum üçün. Əgər bunu qəbul etmirsinizsə, yenə də problem deyil — sadəcə Azərbaycanlı qadın Avropa çempionu olduğum üçün yanaşa bilərdiniz.
Nə mən, nə bacım, nə qardaşım şəhid statusundan, atamın adından istifadə etməmişik və belə fikrimiz də yoxdur. Qızıl medalı atama həsr etmişəm və bunda qəbahət görmürəm".
Qeyd edək ki, 1992-ci ildən ordu sıralarına qatılmış Vasif Sadıqov I Qarabağ müharibəsi iştirakçısıdır. O, 2010-cu ilin yanvarın 28-də Daşkəsəndəki N saylı hərbi hissədə 1990-cı il təvəllüdlü Elxan Əzizov və 1991-ci il təvəllüdlü Sadiq Məmmədov tərəfindən zabitlərə atəş açılarkən dünyasını dəyişib. Həmin vaxt Mədinə Sadıqovanın 8 yaşı olub. Vasif Sadıqovun nəşi doğulduğu Ağdaşın Cardam kəndində məzara qoyulub.