Mayın 28-dən 30-dək Bakıda, mayın 31-dən iyunun 10-dək isə Türkiyənin İsparta şəhərində təlim-məşq toplanışında olacaq 21 yaşadək futbolçulardan ibarət Azərbaycan millisinun heyətinə yeni oyunçu cəlb olunub.

Prosport.Az xəbər verir ki, Belçikanın "Sent-Trüyden" klubunun yarımmüdafiəçisi Mustafa Kamara U-21 millinin düşərgəsinə qoşulub.

18 yaşlı sol cinah yarımmüdafiəçisi 2025/2026 mövsümündə "Sent-Trüyden"in U-18 komandasının heyətində ümumilikdə 19 oyun keçirib, 2 qol vurub.

U-21 Türkiyədəki hazırlıq çərçivəsində iyunun 6-da Bəhreyn, 9-da isə Qırğızıstanın müvafiq yaş qrupundan ibarət komandasına qarşı yoldaşlıq oyunu keçirəcək.

Qeyd edək ki, Mustafa Kamara 2007-2012-ci illərdə "Qəbələ"nin formasını geyinmiş qvineyalı Abdul Kader Kamaranın oğludur. Mustafa 2008-ci il martın 3-də Azərbaycanda anadan olub.

Əldə etdiyimiz məlumata görə, onun atası həmin vaxt Mingəçevirdə yaşadığından, orada doğulub.