Azərbaycan Premyer Liqasının XXXIII turunun “Kəpəz” – “Neftçi” oyunundan (0:1) sonra gəncəlilərin baş məşqçisi Azər Bağırov jurnalistlərin suallarını cavablandırıb.
Prosport.Az xəbər verir ki, mütəxəssis əvvəlcə görüşlə bağlı fikirlərini bölüşüb.
– Mövsümün son oyununda gənclərə şans verdik. Ola bilsin ki, onlar gələcəkdə Azərbaycan futbolunun əsas simalarına çevrilsinlər. Komandaya gələndə 6 oyunluq məğlubiyyətsizlik seriyası var idi. Çətin vaxtda bu işə başladıq. Legioner transferi olmadan komandanı liqada saxlamaq asan iş deyil. Klubdakı hər kəsə təşəkkür edirəm.
– Hansı gənc oyunçuları xüsusi qeyd edərdiniz?
– Şahnur və Raulu fərqləndirərdim. Onların üzərində diqqət var. Gənclərlə işləmək çox çətinlik yaratmışdı. Bu gün onlara şans vermək istədim.
– Adınız “Şamaxı”yla hallanır. Bu məsələyə aydınlıq gətirə bilərsiniz?
– Bu haqda danışmaq istəmirəm. Təki, hər şey Azərbaycan futbolu üçün uğurlu olsun.
– Komandaya gəldiyiniz vaxtdan etibarən demək olar, bütün rəqiblərdən xal ala bildiniz. Matçdan sonra azarkeşlər sizə qarşı şüarlar səsləndirdi. Sanki Gəncə camiəsi sizə qarşı haqsızlıq edir…
– Anlaşılmazlıq həmişə olur. Azarkeşlərdən razıyam. Gəncə fanatları futbolu bilirlər, rəhbərliklə də problemim yoxdur. Qalmağımla bağlı təklif də oldu, sadəcə beynimdə bəzi məsələlər var.
– Daha yaxşı təklif aldığınızı dediniz. Nə üçün razılığa gələ bilmirsiniz?
– Harda oluramsa olum, doğruluğun və verilən sözlərin arxasında dayanmağın tərəfdarıyam. Yəni, sabah büdcə problemi yaranarsa, hansısa çətinlik yaşanarsa, nəticədə azarkeşlərin qarşısında pis vəziyyətdə qalacağam. Bu gün bəlkə də kimlərsə bunu düzgün qəbul etməz, amma mən yüz ölçüb, bir biçəcəyəm.
– “Şamaxı”nın oyununu izləməyiniz düzgün qarşılanmadı…
– İfadəmə görə üzr istəyirəm, Qəbələdə futbola baxmışam, bara getməmişəm ki… Stadionda olmağım normal şeydir. Bunları nəyəsə bağlamaq düzgün deyil.
– “Kəpəz” rəhbərliyi ilə münasibətiniz necədir?
– Çox yaxşı. Sadəcə bəzi məsələlər var ki, onların dəqiqləşməsini gözləyirik. Qeyri-müəyyənliklər olduğu üçün qərar vermək çətinləşir.
– Rəhbərliyin tələbi avrokuboklardır?
– Xeyr. Bu məsələnin kökündə daha böyük məqamlar dayanır. Söhbət tək büdcədən getmir. Bir komandanın formalaşması üçün ən azı üç il vaxt lazımdır. Çempion olaq, avrokuboklara vəsiqə qazanaq, amma nəylə?