Almaniyanın Frankfurt şəhərində keçirilən karate üzrə Avropa çempionatının 4-cü günü Azərbaycan 3-cü medalını qazanıb.

Prosport.Az-ın Frankfurta ezam olunmuş əməkdaşının verdiyi xəbərə görə, olimpiya mükafatçısı, dünya və Avropa çempionu İrina Zaretska bürünc medal qazanıb.

68 kq çəki dərəcəsində çıxış edən İrina Zaretska Maria Nietoya (İspaniya) 6:1 qalib gələrək bürünc medalı əldə edib. Bu, ukraynalı legionerimizin 5-ci Avropa çempionatı medalı olub

Gülay Orucova (61 kq) Emina Spinoviçə 0:4 uduzaraq karyerasında ilk dəfə bürünc medal qazanmaq imkanını qaçırıb.

Qeyd edək ki, daha əvvəl 2 parakarateçimiz – Fərrux Qaybalıyev və Aysel Əhmədli bürünc medal qazanıb. Həmçinin, bu gün Mədinə Sadıqova (55 kq) final görüşünə çıxacaq. Sabah isə qadın kumite millimiz bürünc medal üçün mübarizə aparacaq.

Səbuhi Musa
Frankfurt