"Araz-Naxçıvan"ı gələn mövsümdə kimin çalışdıracağı dəqiqləşib.

Prosport.Az sportinfo.az-a istinadən xəbər verir ki, Cavid Hüseynov komandanın sükan arxasına gətirilib.

2025-ci ilin martından bəri heç yerdə rəsmən fəaliyyət göstərməyən gənc mütəxəssislə hərtərəfli anlaşma əldə olunub. Nəzərdə tutulmuş müqavilənin müddəti 1 ildir.

"Ağ-qırmızılar" Hüseynovun elitada 3-cü iş yeridir. O, daha öncə "Şamaxı" və "Səbail"də tər töküb.

Beləliklə, cari ilin yanvarında "Araz-Naxçıvan"ın sükanı arxasına keçən Andrey Demçenkonun Azərbaycandakı missiyası başa çatıb. Klub rəhbərliyi bir araya gələrək, onunla bağlı yekun qərarını verib.

Ukraynalı mütəxəssis mayın 23-də komandanı təhvil verəcək. Muxtar Respublika təmsilçisi həmin gün Premyer Liqanın son turu çərçivəsində "Zirə" ilə qarşılaşacaq.

Bura gələnədək Gürcüstan və Qazaxıstanda çalışmış Demçenko artıq onunla əlaqəli qərardan halidir. Rəsmilər diqqətinə çatdırıb ki, müqavilənin gələn sezona aid hissəsi qüvvəyə minməyəcək.

Səbəb qarşıya qoyulan məqsədin yerinə yetirilməməsidir. Belə ki, çempionatın geridə qalan hissəsində 43 xal toplayan kollektiv turinir cədvəlinin 6-cı pilləsində yer alıb və avrokuboklardan kənarda qalıb.

Demçenko rəhbərliyin mövqeyi ilə razılaşıb. O, üzərinə götürdüyü vəzifənin öhdəsindən gələ bilməməsinə bir neçə səbəb göstərib.

Qeyd edib ki, şəraitin zəifliyi və bir çox futbolçunun işinə məsuliyyətsiz yanaşması "Araz-Naxçıvan"ın qitə arenasına çıxmasına mane olub.