“Qarabağ”ın bir çox legioneri Azərbaycan Premyer Liqasının sonuncu - XXXIII turunu gözləmədən ölkələrinə gedib.

Prosport.Az futbolinfo.az-a istinadən xəbər verir ki, baş məşqçi Qurban Qurbanov onlara daha çox dincəlmək üçün şərait yaradıb.

Avropa Liqasının I təsnifat mərhələsindən mübarizəyə başlayacaq Ağdam klubunun oyunçuları təlim-məşq toplanışına tez başlayacağı üçün çalışdırıcı bu addımı atıb. Onların Çempionlar Liqası və çempionatda çoxsaylı oyunlar keçirdiyini nəzərə alan mütəxəssis istirahət üçün futbolçulara icazə verib.

“Qarabağ”ın son turda “Sumqayıt”la matçı da formal xarakter daşıyacaq.

Kamilo Duran, Leandro Andrade, Marko Yankoviç, Kevin Medina, Mateus Silva, Pedro Bikalyo, Kadi və Abdulla Zubir artıq klubun düşərgəsindən ayrılıb və öz ölkələrinə yollanıblar.