Azərbaycanın 19 yaşadək qadın futbolçulardan ibarət milli komandasının üzvü Aysu Əsədova sərt cəzalandırılıb.

Prosport.Az xəbər verir ki, bu barədə UEFA-nın Nəzarət, Etika və İntizam Komitəsi qərar qəbul edib. 

Buna futbolçunun aprelin 17-də Gürcüstana qarşı keçirilmiş Avropa çempionatının seçmə matçında rəqib oyunçuya hücum etməsi səbəb olub.

UEFA-nın İntizam Reqlamentinin müvafiq maddəsinə əsasən, Əsədova qitə futbol qurumunun milli komandalar arasında keçirilən yarışlarından 3 oyunluq diskvalifikasiyaya məruz qalıb.

Xorvatiyanın Luçko şəhərində təşkil olunan görüşdə Azərbaycan millisi 1:4 hesabı ilə məğlub olub. Əsədova 65-ci dəqiqədə sarı vərəqə alsa da, 90+4-cü dəqiqədə 2-ci "sarı"dan yox, birbaşa qırmızı vərəqə ilə meydançadan qovulub. 

Xatırladaq ki, Aysu Əsədova "Sabah" komandasında çıxış edir. O, 2025-ci ildə bu klubun U-17 komandasının heyətində mövsümün ən yaxşı oyunçusu seçilib.