Belarusun ev sahibliyi etdiyi MDB Ölkələrinin Oyunlarının cüdo yarışlarında Azərbaycan cüdoçuları 3 qızıl və 2 bürünc medal əldə edib.

Prosport.Az xəbər verir ki, yarışın ilk günündə qızlar və oğlanlar arasında 8 çəki dərəcəsində 16 cüdoçumuz medallar uğrunda mübarizə aparıb.

Oğlanlardan Nihad Məmişov (50 kq), Ayxan Mirzəzadə (55 kq) və Cəsur İbadlı (66 kq) bütün görüşlərində qalib gələrək qızıl medal qazanıb. Qızlar arasında Xədicə Abdullayeva (40 kq) və Aytən Verdiyeva (52 kq) yarışın bürünc medalını əldə edib.

Bundan başqa, bədii gimnastika üzrə qrup komandamız çoxnövçülük, topla və iplə hərəkətlərin icrasında 3 bürünc, yunan-Roma güləşçilərimizdən Məhəmməd Şükürzadə (60 kq), Ziya Babaşov (63 kq), Xasay Həsənli (77 kq), Murad Əhmədiyev (97 kq) və Sərxan Məmmədov (130 kq) gümüş, Tural Mehdiyev (55 kq), Həsən Məmmədli (67 kq), Elcan Məmmədov (82 kq) və Məhəmməd Əhmədiyev (87 kq) isə bürünc medal qazanıb.

Azərbaycan hazırda 3 qızıl, 5 gümüş və 9 bürünc medalla 4-cü sıradadır. İlk sırada 36 medal qazanmış Rusiyadır (17-7-12). Meydan sahibi Belarus (6-6-7) 2-ci və Özbəkistan (4-6-3) 3-cüdür. 

Avqustun 4-də başlayan II MDB Oyunları ayın 14-də başa çatacaq. Belarusun 11 şəhərində gerçəkləşən yarışda idmançılar 20 növdə mübarizə aparır. Yarışda Azərbaycanın 15 idman növündə (güləş, bədii gimnastika, güllə atıcılığı, çimərlik futbolu, futzal, atletika, cüdo, boks, kamandan oxatma, ağırlıqqaldırma, üzgüçülük, muay-tay, karate, sambo, para idman rəqsi) 177 idmançısı çıxış edir. MDB ölkələrindən başqa, Vyetnam, Misir, İran, Kuba, Livan, BƏƏ, Pakistan, Monqolustan, Bəhreyn, Malayziya, Küveyt, Oman və Venesuela idmançıları da bu yarışa qatılıb.