"Şəki Siti" futbol üzrə Azərbaycan II Liqasının "Ağstafa Gəncləri" ilə oyununa 9 futbolçu ilə çıxıb.

Prosport.Az xəbər verir ki, buna səbəb isə 5 oyunçunun maaş almamaq iddiası ilə meydana çıxmaqdan imtina etməsidir.

Maraqlıdır ki, futbolçuların meydana çıxmaqdan imtina etməsini komandanın kapitanı Rəsul İbrahimov təşkil edib.

Şəki təmsilçisi də məlumatı təsdiqləyib. Klubdan bildirilib ki, Rəsul İbrahimov, Zaur Fərzəliyev, Çərkəz Hüseynov, Mehdi Həşumov və Nazim Bağırov oyuna çıxmaqdan imtina edib: "Adıçəkilən futbolçular 2-ci dövrə ərzində keçirdikləri oyunların və may ayına qədər olan bütün ayların əmək haqlarını alıblar. Hazırda isə may ayı çərçivəsində cəmi 2 oyun keçirilib və hər hansı rəsmi əməkhaqqı gecikməsi mövcud olmayıb.

Buna baxmayaraq, futbolçular tərəfindən “son oyundur, ödəniş edilməyə bilər, əvvəlcədən ödəniş edilsin” kimi əsassız iddialar irəli sürülərək komandanın son oyununa çıxmaqdan imtina edilib.

Klub daxilində aparılmış araşdırma zamanı müəyyən edilib ki, komandanın kapitanı Rəsul İbrahimov  futbolçularla əlaqə saxlayaraq onların da oyunda iştirak etməməsi üçün çağırışlar edib və bir neçə oyunçunun oyuna gəlməsinə əngəl olub. Bu səbəbdən komanda XXVII turun "Ağstafa Gəncləri" ilə oyuna 9 nəfər oyunçu ilə çıxıb".

Qeyd edək ki, qarşılaşma Ağstafa təmsilçisinin 3:1 hesablı qələbəsi ilə başa çatıb.