Azərbaycan Premyer Liqasının XXXII turunun “Sabah” – “Neftçi” oyunundan (1:2) sonra qonaq komandanın baş məşqçisi Yuri Vernidub jurnalistlərin suallarını cavablandırdıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bölüşüb.

– Düşünürəm ki, gözəl axşamdır. Qarşımıza qoyulan məqsədə çatdıq.

– Bura gələndə əmin idiniz ki, hədəfə çatacaqsınız?
– İşimizi elə qurmalıydıq ki, mövsümün sonunda istədiyimiz yerdə ola bilək. Bilirdim ki, 4-cü pillə bizdən çox uzaqdadır, amma qarşıda 19 oyunun olduğunu da nəzərə alırdım. 2025-ci ilin sonunda komandaya qoşuldum və qarşıda cəmi 2 matç var idi. Həmin görüşlərdən sonra fasilə yarandı və oyunçularla daha yaxından işləmək imkanı verdi. Qarşıdakı tapşırığın çətin olduğunu bilirdim, amma uğur qazanacağımıza inanırdım. Daha yaxşı oynamaq və daha çox çalışmaq lazım idi. Bunları etdikdə, Allahın da bizi mükafatlandıracağını bilirdim. Səmimi deyirəm, bu gün çox xoşbəxtəm.

– Komandada əsas nəyi dəyişdiniz ki, bu nəticəni əldə etdiniz?
– Futbolçularla fərdi danışdıq, nizamı bərpa etdik. Oyunçuları kifayət qədər yüklədik. Çünki anlayırdıq ki, biz “Neftçi”yik, bütün matçlarda “bir nömrə” kimi oynamalıyıq. Ən azı  “Sabah”, “Qarabağ”  səviyyəsində futbol sərgiləməyə çalışmalı idik. Komandada inam formalaşdırdıq və bunun nəticəsində yolumuza davam etdik. Futbolçuların məşqçilər korpusuna güvənməsi mühüm amillərdən biri oldu. Klubdakı bütün işçilərə təşəkkür edirəm, hər birinin böyük rolu var. Xüsusilə, rəhbərliyə təşəkkür edirəm. Onlar hər zaman yanımızda oldular, bizə dəstək verdilər. Bu, komandamız üçün çox vacib idi. Məhz bu amillər qələbələrimizin əsasını təşkil etdi.

– Bu heyətlə Avropada uğur qazanmaq olar?
– Komandaya gələndə bildirmişdim ki, mövsümün sonuna kimi heç kimlə yollar ayrılmayacaq. Bu məsələlərlə bağlı qərarların yayda veriləcəyini demişdik. Bəzi futbolçuların müqavilələri başa çatır. Başa düşürəm ki, Avropada yaxşı mübarizə aparmaq üçün yeni adlara ehtiyac var. İstəməzdim ki, Konfrans Liqasına gedib elə birinci mərhələdə dayanaq. Çempionlar Liqasında, Avropa Liqasında qruplarda iştirak etmişəm. Konfrans Liqasında da bunu etmək istəyirəm. Bütün bunları nəzərə alaraq, uyğun qərarlar verəcəyik. Görəcəyimiz işlər çoxdur. Hədəfə çatmaq üçün böyük əmək sərf etməliyik.