FIFA-nın "Qarabağ"a transfer qadağası qoymasının təfərrüatları bəlli olub.

Prosport.Az sportinfo.az-a istinadən xəbər verir ki, Ağdam klubu Julio Romaoya görə bu vəziyyətlə üzləşib.

Belə ki, braziliyalı yarımmüdafiəçini 2022-cü ilin yayında sıralarına qatan “köhlən atlar“dan FIFA-ya şikayət edən “Santa Klara“ olub.

Portuqaliya klubu 2025-ci ilin yayında “Qarabağ“ın Romaonu “Ferensvaroş“a göndərib, əvəzində Kadini geri qaytardığı transfer əməliyyatına görə beynəlxalq quruma öz narazılığını bildirib

“Santa Klara“ bu “dəyiş-düyüş“ə görə təzminat tələbi irəli sürüb. Qarşı tərəf “Qarabağ“ın onlara 1 milyon avro ödəməsi gərəkdiyi barədə FIFA-ya məktub ünvanlayıb.

Sənəddə göstərilib ki, 2022-ci ilin iyununda Romaonun keçidi zamanı müqavilədə xüsusi bənd yer alıb.Həmin bəndə əsasən, futbolçunun 3-cü tərəfə satışından əldə edilən gəlirin 20 faizi “Santa Klara“nın hesabına köçürülməlidir. Bu səbəbdən FIFA-nın müvafiq portalı avtomatik olaraq klubu "qırmızı siyahı"ya salıb.

"Qarabağ"ın sorğusundan sonra olayı araşdıran qurum müəyyənləşdirib ki, Romaonun "Ferensvaroş"a yollanması "barter" anlaşmasıdır. Yəni, "köhlən atlar" onun gedişindən pul qazanmayıb. 

Bununla belə, FIFA "Qarabağ"ın "Santa Klara"ya 200 min avro təzminat ödəməsini lazım bilib. Premyer Liqamızın hazırkı vitse-çempionu həmin məbləği qarşı tərəfə köçürüb və beləcə qadağa avtomatik olaraq aradan qaldırılıb.