Azərbaycan millisinin və “Arda”nın futbolçusu Cəlal Hüseynov ötən gün Bolqarıstan çempionatında “Botev”lə matçdakı (2:1) dublu haqda danışıb.

Prosport.Az xəbər verir ki, 23 yaşlı futbolçu ən yaxşı günlərindən birini keçirdiyini deyib: 

"Qeyd etdiyiniz kimi, ilk dəfədir dubl edirəm. Bu, mənim üçün ən yaxşı günlərdən biridir. Mənə dəstək olan hər kəsə təşəkkür edirəm. Bilirik ki, “Botev” yaxşı komandadır. Turnir cədvəlində bir-birimizə yaxınıq. Daha böyük fərq yaratmaq üçün qalib gəlməli olduğumuzu anlayırdıq. Mövsümü daha yaxşı şəkildə başa vurmaq üçün imkanlarımız var və bunu etməliyik".

Müdafiəçi qollarını ailəsinə həsr etdiyini bildirib: "Bu, futboldur. Biz 11 nəfərlə oynayırıq. Vurduğum 2-ci qolun mükəmməl ötürməsini Dimitar Velkovski vermişdi. Qolun sirri də budur. Bugünkü qollarımı ailəmə həsr etmək istəyirəm”. 

O, “Lokomotiv”ə qarşı keçirəcəkləri növbəti matç haqda fikirlərini də bölüşüb: "Bəlkə də onlar rotasiyalar edəcəklər. Görəcəyik. Amma həm növbəti oyunda, həm də son matçda yalnız 3 xal haqqında düşünməliyik. Və yalnız bu şəkildə şanslarımızdan yararlana biləcəyik".

Millimizin üzvü Bolqarıstanda çətinlik çəkmədiyini, ölkənin dilinə hakim olduğunu söyləyib: "Mən bolqar dilini bilirəm. Danışmağı bacarıram, amma bir az utanıram. Paltardəyişmə otağında və komandada bolqar dilində danışıram və hər şeyi başa düşürəm".