Azərbaycan Premyer Liqasında sona 2 tur qalmış 63 xalla 2-ci pillədə qərarlaşan “Qarabağ”ın avrokuboklara hansı turnirdən başlayacağı öz əlində deyil.

Prosport.Az xəbər verir ki, 3-cü pillədəki “Turan Tovuz”u 4 xal qabaqlayan Ağdam təmsilçisinin böyük ehtimalla mövsümü gümüş mükafatla başa vuracağını söyləmək olar.

Belə olarsa, Qurban Qurbanovun komandası Azərbaycan Kubokunun finalını gözləməli olacaq. Premyer Liqanın çempionu “Sabah” kubokun finalında “Zirə”yə qalib gəlsə, “Qarabağ” növbəti mövsüm Azərbaycanı Avropa Liqasında təmsil edəcək. Belə olarsa, I təsnifat mərhələsindən mübarizəyə qoşulacaq “köhlən atlar” raundun ən yüksək reytinqli komandalarından biri olacaq.

Aktivində 42,750 əmsal olan “Qarabağ” belədə səpələnmişlərdə qərarlaşacaq. Bu isə təmsilçimizə nisbətən zəif rəqiblə qarşılaşma imkanı verəcək. Artıq 2 potensial rəqib də məlumdur. Belə ki, “Qarabağ” Avropa Liqasına yollansa, püşkatma zamanı “Derri Siti” (İrlandiya) və ya “Vestri”yə (İslandiya) rəqib ola bilər. Həmçinin Sloveniya Kubokunun qalibi də bu sıraya qoşulacaq.

“Zirə” isə ölkə kubokunu qazanacağı təqdirdə Avropa Liqasının bu raundunun püşkatması zamanı səpələnməmişlərdən biri olacaq.