Azərbaycan millisinin qapıçısı Emil Balayevin "Neftçi"dəki durumuna aydınlıq gəlib.

Prosport.Az sportinfo.az-a istinadən xəbər verir ki, 2023-cü ilin yayında bura dönən qolkiper ən azı daha 1 il "ağ-qaralar"ın formasını geyinəcək.

O, klub rəhbərliyinin müqavilənin müddətini uzatmaqla bağlı çağırışını müsbət qarşılayıb. Tərəflər 1+1 illik anlaşmaya dair razılığa gəlib.

Buna əsasən, Balayevin maaşına yenidən baxılacaq. Hazırda onun aylıq məvacibi 10 min manatdır.

İllər əvvəl ölkənin əsas yığmasının "1 nömrə"si olmuş "əlcək sahibi" ilk 2 mövsümdə 20 min manat əməkhaqqı alırdısa, ötən ilin yayında bu məbləğ iki dəfə aşağı salınıb.

Səbəb aldığı ağır zədə üzündən uzun müddət yaşıl meydanlardan uzaq düşməsi və oyun praktikasını itirməsidir.

Ötən sezon Rza Cəfərovun, bu dəfə isə Kenan Piriçin kölgəsində qalan Balayev yalnız son həftələrdə "çərçivə"yə dönüb.

Premyer Liqanın axır 3 turunda "1 nömrə"ni geyinən qapçının ayağı düşərli olub. "Qarabağ", "Karvan-Yevlax" və "Şamaxı" ilə görüşlərdə o, inamlı təsir bağışlayıb, komandası isə qələbələri sıralayıb.

31 yaşlı qolkiper bu oyunlarda qapısından cəmi 1 top buraxıb.