Albaniya çempionatında 2025/26 mövsümünün əsas mərhələsi başa çatıb.

Prosport.Az xəbər verir ki, ötən gecə sonuncu – XXXVI turun oyunları keçirilib.

Azərbaycanlı futbolçuların komandaları da növbəti oyunlarına çıxıblar. Zamiq Əliyevin formasını geyindiyi “Eqnatiya” səfərdə “Teuta” ilə qarşılaşıb və 2:3 hesabıyla uduzub. Start heyətdə meydana çıxan Əliyev fasilədə əvəzlənib.

İsgəndərlinin komandası “Partizani” isə son turda Tirana “Dinamo”sunu qəbul edib və 2:1 hesablı qələbəyə sevinib. Millimizin üzvü mövsümün son oyununda iştirak etməyib.

48 xal toplayan "Partizani” üçün mövsüm başa çatıb. 57 xalı olan “Eqnatiya” isə 3-cü yeri tutub və çempionluq uğrunda mübarizə aparmaq hüququ qazanıb. Bu komandanı ilk 4 yeri tutmuş kollektivlər arasında keçiriləcək həlledici oyunlar gözləyir.