Azərbaycan Premyer Liqasının XXXI turunun “Sumqayıt” – “Araz-Naxçıvan” oyunundan (2:1) sonra meydan sahibi komandanın məşqçisi Veliçko Kaplanoviç fikirlərini bölüşüb.

Prosport.Az xəbər verir ki, mütəxəssis əvvəlcə görüşlə bağlı danışıb.

– Futbolçulara təşəkkür edirəm, yaxşı nəticə qazandıq. 1-ci hissədəki oyunumuzdan razı qaldım. Amma fasilədən sonra rəqib üstünlüyü ələ aldı və fərdi səhvimizdən yararlandı. Qoldan sonra temp aşağı düşdü. Şadam ki, xarakter göstərib, istədiyimiz nəticəni əldə etdik. "Barselona" kimi oynamasaq da, yaxşı qələbə oldu. Bu gün bəzi gənc futbolçulara da şans verdik.

– Fasilədən sonra üstünlüyün rəqibə keçməsi nə ilə bağlı idi? 

– "Araz-Naxçıvan" keyfiyyətli komandadır. Fərdi olaraq yaxşı oyunçulara sahibdirlər. Ən böyük problem o idi ki, tez-tez ötürmə səhvlərinə yol verdik. Buna görə üstünlük onlara keçirdi.