“Qarabağ” Azərbaycan Premyer Liqasının XXXI turunda səfərdə “Qəbələ” ilə 1:1 hesablı heç-heçə edib.

Prosport.Az xəbər verir ki, Ağdam təmsilçisinin baş məşqçisi Qurban Qurbanov matçdan sonra keçirilən mətbuat konfransında jurnalistlərin suallarını cavablandırıb.

– Azarkeşlərə təşəkkürümü bildirirəm. Uzaq səfər olmasına baxmayaraq, gəlib komandaya dəstək oldular. Oyuna gəldikdə isə bu gün futbolçularımın tam gücləri ilə oynadılar. Onlara elə bir iradım yoxdur. Qalib gələ, bəlkə məğlub da ola bilərdik. Sonda yaxşı, intizamlı bir kollektivlə bərabərə qaldıq. “Qəbələ” həm oyununa, həm xarakterinə görə daha üst yerlərdə olmalı idi. Kaxaber Sxadadze gözəl sistem qurub, döyüşçülər yetişdirib. Çempionatın sonuna yaxınlaşmışıq. Həm psixoloji, həm də fiziki yorğunluq futbolçulara təsir edir. Qarşıda 2 oyunumuz var. Onlara ciddi hazırlaşmalıyıq. Nəticə oyuna tam uyğun idi. Hər iki komandaya uğurlar arzulayıram.

– 90 dəqiqə ərzində dəyişiklik etməməyinizin səbəbi nə idi?
– Sonlara yaxın düşündük, lakin sistemin pozulmasından ehtiyat etdik. Belə havada meydana sonra daxil olan oyunçularda bir az tənəffüs prosesi çətin olur. Adətən bura səfərə gələn komandalar üçün oksigen bir az ağır olur. Oyuna necə hazırlaşmışdıqsa, sona qədər elə davam etməyi, oyunu pozmamağı qərara aldıq. Həm də rəqib qapanmışdı. Hansısa sürətli oyuna ehtiyac yox idi. Daha çox meydanda bir-birini tamamlayan gedişlər olmalı idi. Həm də istədim oyunçular 90 dəqiqə matçın gərginliyini hiss etsinlər.

– Kubokun “Sabah”la oyununun cəzaları açıqlandı. Belə ağır qərarlar gözləyirdiniz?
– Deyəcək bir söz yoxdur. Əgər aqressiv hərəkətimiz olubsa, özümüzü hansısa epizoda görə haqlı çıxarda bilmərik. Fakt aqressiv formada hərəkət ediblər, hakimə təzyiq göstəriblər. Bu, federasiyanın qərarıdır. Biz də razılaşmalıyıq.