"Kəpəz"i təbrik etmək istəyirəm. Bu qalibiyyət onlar üçün çox böyük uğur və qələbədir. Bu gün çox şey demək istəmirəm. İlk hissədə daha çox dominant, daha yaxşı oynayan tərəf biz idik. Sadəcə, künc zərbələrindən 3-4 qol fürsətimiz oldu ki, "Kəpəz"in qapıçısı çox yaxşı çıxış etdi, qol vurmağımıza imkan vermədi. 2-ci hissədə müəyyən dəyişikliklər etdik. Amma bundan sonra oyun ritmimiz kifayət qədər düşdü. Daha sonra anlaşılmaz səhv buraxdıq. Belədə, rəqib də fərqləndi. "Kəpəz" öz qapısına tərəf çəkildi. Hücumlar zamanı səbirli olmalıydıq, amma bəzən tələsirdik. Bütün bunları unutmalıyıq. Düzdür, bir balaca üzgünük. Çünki uzun müddətdir ki, məğlubedilməzliyimiz var idi. Amma üzülməyə vaxt yoxdur. Qarşıdakı vacib final oyununa hazırlaşmalıyıq".

Prosport.Az xəbər verir ki, bu sözləri "Sabah"ın litvalı baş məşqçisi Valdas Dambrauskas Azərbaycan Premyer Liqasının XXXI turunun "Kəpəz"lə (0:1) görüşündən sonra keçirilmiş mətbuat konfransında deyib.

– Demək olar ki, bəzi futbolçuların fikri Kubokun final matçında idi? Bu onların performansına təsir etmişdi?
– Əlbəttə ki, müəyyən mənada fikrinizlə razıyam. Bu gün daha az oynayan futbolçularımıza şans verdik. Müəyyən mənada risk etmək də istəmədik. Çünki zədəlilərimiz ola bilərdi. Amma onlar da bu gün göstərməliydilər ki, öz keyfiyyətləri necədir, nə edə bilərlər. İstədiklərimizə bu gün müəyyən mənada müvəffəq ola bilmədik. Amma onların davranışından, göstərdikləri cəhdlərdən şikayət edə bilmərəm. Adicə bir oyunçunu dəyişəndə, komandada dinamika düşür. Təsəvvür edin, 5-6 oyunçu dəyişirsən. Bu isə asan deyil. Əgər bu gün meydana çıxan heyət 5-6 oyun ardıcıl birlikdə çıxış etsəydi, fərqli mənzərəyə şahid olardınız. Sabah bərpa məşqimizi keçəcəyik. İnkişaf etdirməli olduğumuz məsələlər üzərində işləyib, çərşənbə günü keçiriləcək matçı izləyəcəyik.