1 ay sonra "Qarabağ"da "yarpaq tökümü"nə start veriləcək.

Prosport.Az sportinfo.az-a istinadən xəbər verir ki, səlahiyyət tamamən baş məşqçidədir.

Fevraldan bəri oyunları yola verənlər Qurban Qurbanovun gözünün qabağındadır. Hamısının yaxasından tək-tək yapışacaq.

Sorğu-sual otağına çağıracaq, o stulda əyləşdirəcək, cavab tələb edəcək. Kim bir az "nəm-nüm" elədisə, adına, müqavilə müddətinə baxmadan qapıdan yola salacaq.

İşin içindən bəzi sürpriz adlar da çıxacaq. Hansılar ki, media və ictimaiyyət onların "Qarabağ"dan göndəriləcəyini ağlının ucundan belə keçirmir.

Bu, "təmizləmə aksiyası" olmayacaq, "silib-süpürmək əməliyyatı" olacaq. "Qara siyahı" dünəndən hazırdır. Orada 10-dan artıq futbolçunun adı var. Siyahıda müqavilə müddəti qurtaranlarla yanaşı, kontraktı davam edən bir neçə nəfər var.

Anlaşması qüvvədə olanlar sərbəst çıxıb gedə bilməyəcək. Hər birinə müəyyən qiymət qoyulacaq - müştərilərə təzminatın məbləğində güzəşt edilməyəcək. Müəyyənləşdirilən qiymət nədirsə, o da ödənilməlidir.

Ağdam klubunun mövsümü titulsuz başa vuracağı dəqiqləşib. "Köhlən atlar" çempionat və kubok yarışında "Sabah"a məğlub olub.