Azərbaycan Premyer Liqasının XXX turunun “Karvan-Yevlax” – “Neftçi” oyunundan (0:3) sonra meydan sahibi komandanın baş məşqçisi Füzuli Məmmədov jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bölüşüb.

– Danışılası çox şey yoxdur. Matça ciddi hazırlaşmışdıq, düşünürdük ki, yaxşı oynayacağıq. Qola qədər komanda pis təsir bağışlamadı. Lakin xırda səhvdən rəqib fərqləndi və oyun pozuldu. 2-ci qol epizodu isə bizə çox təsir etdi. Qarşıda 3 oyunumuz qaldı. Nə şansımız varsa, sona qədər mübarizə aparacağıq. Çalışacağıq, komandamız bu durumdan qurtulsun.

– Qoldan sonra komanda çox zəif çıxış etdi. Bu, nə ilə bağlıdır?
– 1-ci qol bizi sındırmadı. İlk hissənin sonları idi və düşünmürdük ki, belə rahat qol vurarlar. 2-ci qoldan sonra eniş hiss olundu və bu da normaldır. Məğlub olmaq istəmirdik. Rəqibin fərqlənməsindən sonra futbolçularda ruh düşkünlüyü yarandı və bilirdik ki, geridönüş çox çətin olacaq.

– Təqvimə baxanda, şanslarınızı necə dəyərləndirirsiniz?
– Həm “Qəbələ”nin, həm bizim çətin oyunlarımız var. Xal fərqi 6-dır və qarşıda “Qəbələ”yə qarşı matç var. Hər görüşə ciddi hazırlaşacağıq.

– Digər ölkələrdə belədir ki, mövsümün sonunda liqada qalmaq uğrunda oynayan komandaların matçları eyni gündə olur. Bizdə isə fərqlidir…
– Təqvimə uyğun planımızı quracağıq. Artıq nəsə edə bilmərik. Maksimum çalışacağıq ki, komanda növbəti oyuna hazır olsun.