Azərbaycan Premyer Liqasının XXI turundan təxirə salınmış “Neftçi” – “Qarabağ” oyunundan (2:1) sonra meydan sahibi komandanın baş məşqçisi Yuri Vernidub suallara cavab vermək istəməyib.

Prosport.Az xəbər verir ki, mütəxəssis media nümayəndələri ilə görüşdə yalnız bunları deyib:

“Neftçi” azarkeşlərini təbrik edirəm, eyni zamanda ötən oyundakı nəticəyə görə (1:5 hesablı məğlubiyyət) onlardan üzr istəyirəm. Belə oynamamalı idik. Bu səhvlərdən nəticə çıxardıq və qələbə qazandıq. Fanatlarımızı bir daha təbrik edirəm. Xahiş edirəm ki, bu gün sual verməyəsiniz. Elə vəziyyətdəyəm ki, bir az sakitləşməyə ehtiyacım var. Qarşıdakı 4 oyunda nə qədər istəsəniz, sual verə bilərsiniz. Bu, hörmətsizlik kimi qəbul olunmasın. Oyun emosional baxımdan məni çox yordu. Bu gün sual olmasa, daha yaxşı olar. Növbəti turda "Şamaxı" ilə oyundan sonra istənilən sualınızı cavablandıracağam".

Qeyd edək ki, "Neftçi" 5 ildən sonra "Qarabağ"a qalib gəlməyi bacarıb. Sonuncu dəfə 2021-ci ildə Samir Abasovun vaxtında "Neftçi" bu uğura yiyələnmişdi.