"Qarabağ"ın baş məşqçisi Qurban Qurbanovun əvəzedici komandaya göndərdiyi Elvin Cəfərquliyev Yunanıstan nəhəngi "Panatinaikos"la danışıqlara başlayıb.

Prosport.Az-ın xəbərinə görə, hazırda onun meneceri Yunanıstan klubuna keçid üçün danışıq aparır.

25 yaşlı sol cinah müdafiəçisinin "Qarabağ"la hələ 1 illik müqaviləsi qaldığından, klub ona başqa klubla danışıq aparmaq üçün icazə verib. "Transfermarkt"a görə, futbolçumuzun dəyəri 1,5 milyon avrodur. Yerli mətbuatda isə "Qarabağ"ın qarşı tərəfdən 2,5 milyon avro istədiyi bildirilir.

Qeyd edək ki, 4-cü sırada olan "Panatinakos"un çempionluq və UEFA Çempionlar Liqasında oynamaq şansı faktiki olaraq tükənib. Lakin sona 4 tur qalmış komandanın UEFA Avropa Liqasında çıxış etmək şansı qalır. Bu alınmasa, Afina klubu növbəti mövsüm UEFA Konfrans Liqasında mübarizə aparacaq.