Azərbaycanda 2 qadın voleybol klubu fəaliyyətini dayandıra bilər.

Prosport.Az-ın xəbərinə görə, bunlar "Abşeron" və UNEC (Azərbaycan Dövlət İqtisad Universiteti) komandalarıdır. Hər iki klub maliyyə çətinlikləri ilə üzləşib.

2017-ci ildən yaradılmış "Abşeron"a 2023-cü ilin mayından İlqar Nuriyev prezident təyin olunub. Vaxtı ilə Sumqayıtın "Gənclərbirliyi" futbol klubunun da rəhbəri olmuş İlqar Nuriyev saytımıza açıqlamasında xəbəri təsdiq edib. O bildirib ki, Azərbaycan Voleybol Federasiyasında İdarə Heyətinin üzvü kimi fəaliyyətini davam etdirəcək.

Çempionatı 6-cı sırada başa vurmuş "Abşeron"un türkiyəli baş məşqçisi Haluk Korkmaz da komandanı tərk edib. O, gümüş medalların sahibi "DH Volley"ə baş məşqçi təyin olunub. Onun "Turan"la final görüşündə kənardan baş məşqçi Fərid Cəlalova "kömək etməsi" diqqətdən yayınmayıb.

UNEC rəhbərliyi də pul ayırmaqdan imtina edib. 5-ci sıranı tutmaq rəhbərliyi razı salmayıb. Bu səbəbdən italiyalı baş məşqçi Covanni Torkyo növbəti mövsümdən "Murov Az Terminal"ı çalışdıracaq. Özü ilə UNEC-dən libero Leyla Parşkova və belaruslu Vera Klimoviçi aparacaq.

"Abşeron"a böyük ehtimalla, yeni rəhbər təyin olunacaq. UNEC-in taleyi barədə qərarı isə universitet rəhbərliyi verəcək.

Səbuhi Musa