Azərbaycan Premyer Liqasının XXIX turunun “Neftçi” – “Qarabağ” oyunundan (1:5) sonra qonaq komandanın baş məşqçisi Qurban Qurbanov jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bölüşüb.

– Futbolçularımı təbrik edirəm, yaxşı oyun göstərdilər və vacib 3 xal qazandıq.

– Start heyəti müəyyənləşdirəndə əsas məqam nə oldu?
– Futbolçuların hazırlığına görə belə addım atdıq. Heyətdə rotasiyalar etmək lazım idi. Çünki oyunçular sıx qrafikdə çıxış edirdilər və yorğunluq yaranmışdı. 3 gün sonra yenidən matçımız var və buna görə ehtiyatlı davrandıq.

– Son günlərin gərginliyi fonunda komandanı bugünkü oyuna hazırlamaq əlavə güc tələb etdi?
– Hazırlığa çox vaxtımız olmadı, komanda olaraq cəmi 1 məşq keçdik. “Neftçi”yə qarşı oynayanda əlavə motivasiyaya ehtiyac olmur. Bu rəqiblə oynamaq xoşdur, azarkeşlər üçün də baxımlı alınır. Növbəti oyuna hazırlaşmaq isə daha çətin olacaq, çünki bu qələbə futbolçularda müəyyən rahatlıq yarada bilər.