Azərbaycan Premyer Liqasının XXIX turunun “Qəbələ” – “Araz-Naxçıvan” oyunundan (1:1) sonra meydan sahibi komandanın baş məşqçisi Kaxaber Sxadadze jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bölüşüb.

– Ümumi baxsaq, 2 xal itirdik. Oyunlarımızda həmişə belə olur. Turnir cədvəlində elə yerdəyik ki, futbolçular əsəbi davranır. Bu, normaldır. İlk hissədə hücumların təşkilində çətinliklərimiz oldu. İkinci hissədə daha aqressiv oynadıq. Qol vəziyyətləri yaratdıq, amma sonluğu tamamlamaqda axsadıq. Bu da futbolçuların gərginliyi və tələskənliyi ilə bağlıdır. Buna baxmayaraq, oyunçularım xarakter göstərdi. Qarşıdakı hər oyun final kimi olacaq. Azarkeşlərə dəstəklərinə görə təşəkkür edirəm. Çətin zamanda yanımızdadırlar. Demək istəyirəm ki, sona qədər bizimlə olsunlar.

– Turan Manafov və Kmbila haradadır?
– Bu sualı klub rəhbərliyinə versəniz, yaxşı olar.

– Qarşıda 4 çətin oyun var. Neçə xal toplayacağınızı düşünürsünüz?
– Hər oyunda döyüşmək lazımdır. Sona qədər mübarizəmizi davam etdirəcəyik. Bu gün bəlkə də, düşünürdülər ki, “Araz-Naxçıvan” rahat qələbə qazanacaq. Bu da turnir cədvəlindəki mövqeyimizə görədir. Lakin göstərdik ki, layiq olduğumuz yerdə deyilik.

– Oyunun sonlarında Prins Ovusunu əvəzlədiniz. Qələbənin vacib olduğu matçda onu əvəzləmək nə dərəcə doğru idi?
– Yorulduğu üçün dəyişdik. Matçın sonlarına doğru rəqib əvəzetmələrlə fiziki baxımdan güclənmişdi. Belə anda tək hücumu deyil, müdafiəni də fikirləşməli idik.